Link açıqlığı

Ukrainanıñ cenübiy vilâyetlerinde Ukraina Arbiy deñiz quvetleriniñ deñiz piyade bölükleri ve yalı raketa-toplar ordusınıñ ögrenüvleri devam ete. Bu aqta arbiy müessiseniñ matbuat hızmeti bildire.

«Ukrainanıñ cenübiy vilâyetleri topraqlarında deñiz piyade bölükleri ve yalı raketa-toplar ordusınıñ ögrenüvleri keçirile. Bu tedbirlerniñ ögrenüv maqsatları, hususan, komandanlar ve ştablarnıñ kerçek vaziyet şaraitte tecribesiniñ zemaneviyleştirilmesi ve bölüklerniñ çalışmaları seviyesiniñ teşkerilmesi ola», – dep qayd etile beyanatta.

Arbiy deñiz quvetleri ştabında qayd ettiler ki, deñiz aviatsiyası ve Ukraina Silâlı quvetler diger aviatsiya çeşitleri desteginen, deñiz piyadeleri ve yalı topçuları infrastruktura müim obyektleriniñ saqlavı ve mudafaası, «duşman» avadan endirilgen birliklerinen küreş, diversiya-istihbarat taqımlarını yoq etüv, deñiz yalısı mudafaası boyunca areketlerni ögrenip baqa.

Bunen beraber, Ukraina Arbiy deñiz quvetleri komandanlığında Herson ve Zaporojye vilâyetleri sakinlerine haber eteler ki, «tedbirlerniñ keçirilecek vaqtında arbiy tehnika kolonnaları keçecek, ögrenüvler ve idmanlar keçirilecek, ava tehnikası uçacaq, arbiy atışma işlep ögrenilecek».

Vatandaşlarğa plan boyunca tedbirler keçirilmesi sebebinden peyda ola bilecek qolaysızlıqlarğa añlap davranmağa muracaat etile.

Cenübiy vilâyetlerde arbiy ögerüvler işğal etilgen Qırımdaki vaziyet kerginleşkeninen bağlı.

Avgust 10-da, çarşenbe künü Rusiye prezidenti Vladimir Putin, Ukraina «Qırımda terakt» azırlağanı aqqında rusiyeli FSB-nıñ beyanatına izaat berip, ilân etti ki, Kiyev muzakereler yollarını qıdırmay, amma terrorğa keçe.

Ukraina prezidenti Petro Poroşenko Kremlniñ Qırım boyunca qabaatlavlarını «mantıqsız ve utanmazca» dep adlandırdı.

Ukraina Silâlı quvetler Baş ştabında Rusiye Federal havfsızlıq hızmetiniñ beyanatını red ete.

Ukraina Tışqı işler nazirligi ilân etti ki, Ukrainada Kiyevniñ işğal etilgen Qırımda «terrorizm» ile bağlı olğanı aqqında Rusiyeniñ beyanatlarını takbih eteler, bunıñ Kreml tarafından nevbetteki provokatsiya olğanını aytalar ve bütün bu qabaatlavlarnı delilsiz dep red eteler.

XS
SM
MD
LG