Link açıqlığı

İrina Yarovayanıñ «antiterroristik tüzetmeler» paketiniñ qabul etileceginden soñ Rusiye tarafından işğal etilgen Qırımda musulmanlar zulum etilecek. Bu aqta Qırım.Aqiqat Radiosınıñ aqşam yayınında Qırımda uquq qoruyıcı merkeziniñ idarecisi Aleksandra Krılenkova bildirdi.

Böyle etip, uquq qoruyıcı «Yarovayanıñ qanunları antiterroristik paketiniñ» qabul etileceginden soñ Qırımdaki diniy tecribeniñ deñişe bilecegine izaat berdi.

«Qırımda qanunlar, Rusiyege köre, daa qattı ve mürekkep ola, ve missioner faaliyeti tarafından çoq tüzetmeler bar, bu, qanunlardır, bunen beraber, diniy faaliyet aqqında qanun. İşbu qanun boyunca evlerde diniy merasimler keçirmek mümkün, amma, meselâ, edebiyatnı tarqatmaq mümkün degil», – dep ayttı Krılenkova.

Uquq qoruyıcı qayd etti ki, rusiyeli qanunlarğa binaen qayd etilmegen diniy cemiyetleriniñ yañı problemaları peyda olacaq.

«Bundan da ğayrı, missioner faaliyetini alıp barğan adamlarnıñ qayd etilgen kilselerden mütenasip razılığı olması kerek. Yani, diniy teşkilâtnıñ umumiy toplaşuvı, işbu din erbabı missioner faaliyetini alıp bara dep belgilemek kerek ve er angi missioner mütenasip vesiqalarnı yanında tutmalı ve olarnı taqdim etmeli. Bu ağırdır, bunen beraber, bütün din cemiyetleri qayd etilmek kerek, amma Qırımda din cemiyetleriniñ rusiyeli qanunlar boyunca qayd etilmesi alâ daa yekünlenmedi. Bazı yerlerde bu, bazı din cemiyetleri içün qolaysızlıq ketire», – dep qayd etti Krılenkova.

Qırım uquq qoruyıcısı bildirdi ki, «ekstremistik faaliyet» aqqında qanunlarnı da unutmamalı.

«Tahminlerge köre, bunen bağlı bazı müşküllikler peyda olacaq, bunen beraber, toplaşuvlarnıñ çoqusı, kerçekten de, evde keçirilgen edi. Bundan da ğayrı, ekstremistik faaliyet añlamı da bar, qaysı biri, aynı bu tüzetmeler paketi boyunca, diniy faaliyet ve toplaşuvlar devamında alıp barılmamalı, buña ise, er şeyni bağlamaq mümkün», – dep ayttı Krılenkova.

İyül 7-de Rusiye prezidenti Vladimir Putin tarafından imzalanğan Rusiye Devlet Duması deputatı İrina Yarovaya ve Federatsiya Şurası azası Viktor Ozerov tarafından işlep çıqarılğan, «antiterroristik» qanunlar paketi boyunca, «çaqmama» ve kütleviy nizamsızlıqta iştirak etmesine «yaqınlaşma» içün cinaiy cezalanma belgilene. Bunen beraber, bağ operatorları endi müşterilerniñ bütün telefon laflarını ve mesajlarını yazmaq ve saqlamaq mecbur. Bundan da ğayrı, vesiqada missioner faaliyeti aqqında maddeler bar.

XS
SM
MD
LG