Link açıqlığı

Rusiye FSB-sı Qırımda Ukraina Mudafaa nazirliginiñ haberalma ağınıñ yoq etilmesi aqqında ilân ete, rusiyeli arbiy adamnıñ elâk olğanı bildirile


Rusiye Federal havfsızlıq hızmeti bildire ki, işğal etilgen Qırımda «Ukraina Mudafaa nazirliginiñ Baş istihbarat idaresi tarafından azırlanılğan» terroristik eylemlerniñ yapılmasına yol berilmedi, «onıñ esas obyektleri olaraq yarımadanıñ pek müim infrastruktura ve ayat teminleme elementleri belgilendi». Bu aqta rusiyeli FSB matbuat hızmeti bildire.

«Diversiya ve terroristik eylemlerniñ maqsadı, federal ve regional ükümet organları saylavlarınıñ azırlanma ve keçirilme vaqtında regionda içtimaiy-siyasiy vaziyetni kerginleştirmektir», – dep aytıla beyanatta.

Elde etilgen malümatqa köre, 2016 senesi avgust 6-dan 7-ge keçer gecesi Ermeni Bazar şeeri rayonında keçirilgen operativ-qıdıruv tedbirleri neticesinde diversant taqımı tapıldı.

«Terroristlerni yaqalağanda atışma neticesinde Rusiye FSB hadimi elâk oldı», – dep aytıla beyanatta.

FSB-de qayd ettiler ki, atışma yüz bergen yerde bular tapıldı: 40 kilogramm trotil umumiy küçünde 20 qolnen yasalğan patlatıcı alet, silâ, minalar, granatalar ve mahsus silâ, qaysı birleri «Ukraina silâlı quvetler mahsus bölükleriniñ silânuvı ola».

«Tedbirlerniñ keçirilmesi vastasınen Qırım yarımadasında Ukraina Silâlı quvetler Mudafaa nazirliginiñ Baş istihbarat idaresiniñ haberalma ağı yoq etildi. Ukraina ve Rusiye vatandaşları olğan şahıslar yaqalandı, olar terroristik eylemlerniñ azırlanılmasında iştirak etken ve itiraf ete», – dep qayd eteler müessisede.

FSB-nıñ malümatına köre, azırlanılğan teraktlar teşkilâtçılarından biri 1977 senesi doğğan Panov Yevgeniy Aleksandroviç ola, o, Zaporojye vilâyetiniñ sakini, Ukraina Mudafaa nazirliginiñ Baş istihbarat idaresiniñ hadimi ola, o da yaqalandı ve itiraf ete.

Bundan da ğayrı, rusiyeli müessisede bildireler ki, «2016 senesi avgust 8-ge keçer gecesi Ukraina Mudafaa nazirliginiñ mahsus bölükleri tarafından diversiya-terroristik taqımlarınıñ keçmesi daa eki ıntıluvı yapıldı, olarnıñ ögüni Rusiye FSB uquq qoruyıcı bölükleri ve işbirlik tutqan müessiseler aldı».

«Atışma neticesinde Rusiye Federatsiyası Mudafaa nazirliginiñ arbiy adamı elâk oldı», – dep aytıla matbuat hızmetiniñ beyanatında.

Operativ-qıdıruv ve arbiy tedbirler neticelerine esaslanıp, Qırım ve Aqyar boyunca Rusiye FSB idaresi tarafından cinaiy iş açıldı.

Ukraina Mudafaa nazirliginde rusiyeli FSB-nıñ malümatına izaat berilmedi.

Qırım.Aqiqat ukrain tarafından izaat almağa tırışa.

Tünevin Ukraina halq deputatı Anton Geraşenko tahmin etti ki, rusiyeli taraf avgust 7-den işğal etilgen Qırım ile memuriy sıñırda areketni dezertirlerge qaçmağa yol bermemek içün blok etti.

Bir sıra Qırım kütleviy haber vastaları yarımada territoriyasında kamuflâj urbalı beş insannı qıdırmaq içün «Qale» planınıñ işke tüşürilmesi aqqında malümat tarqattı.

Yolcularnıñ Qırım.Aqiqatqa bildirgen malümatına köre, GİBDD ve silâlı OMON hadimleri avtobuslarnı toqtata, aydavcılar ve yolcularnıñ vesiqalarını baqıp çıqa.

Avgust 10-ğa keçer gecesi, saba saat 4:30-da rusiyeli taraf Ermeni Bazar yanındaki «Kalançak» keçirüv noqtasını bloktan azat etti, bu noqta avgust 7-den başlap çalışmadı.

Qırım yarımadası ile memuriy sıñırda kritik vaziyet avgust 7-de saba başlandı, o vaqıttan berli rusiyeli taraf üç keçirüv noqtasında bir qaç sefer keçirüv rejimini deñiştire edi, de olarnı blok etip, de açıp. Evel olğanı kibi, rusiyeli taraf bunıñ sebebini añlatmay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG