Link açıqlığı

Qırımtatar Milliy Meclisi reisiniñ birinci muavini Nariman Celâlnıñ fikrince, Türkiye, Rusiyenen munasebetler eyileşken soñ, qırımtatarlar meselesinden suvumaz.

Onıñ fikrince, Türkiye bundan evel de Rusiyenen bu mevzunen bağlı munasebetlerde muqayt olğan, böyle etip, «Qırımda can ağırması ve ğadapnıñ sebepçisi oldı».

«Bunen beraber, türkiyeli ükümetniñ Qırım topraq mensüpligi boyunca qattı noqta-i nazarı bar. Bellesem, Türkiye qırımtatarlarğa nisbeten esas noqta-i nazarını saqlaycaq, ve Ukrainanıñ qıtaiy qısmında qırımtatar leyhalarına ziyade diqqat ayıracaqtır», – dep Facebook saifesinde Nariman Celâl Türkiye prezidenti Recep Tayyip Erdoğannıñ avgust 9-da Rusiyege ziyaretine izaat berdi.

Türkiye yolbaşçısınıñ Rusiyege ziyaretiniñ arfesinde bir sıra ekspert fikrini bildirip, Türkiyeniñ qırımtatarlar mevzusından suvuması mümkün olğanını qaytqan edi.

Rusiye prezidenti Vladimir Putin ve Türkiye prezidenti Recep Tayyip Erdoğan rusiyeli Sankt-Peterburg şeerinde avgust 9-da keçirilgen körüşüvinden soñ, eki devlet arasındaki munasebetlerni olarnıñ arasında dava yüz bergeninden evel olğan seviyege qadar tiklemek esas vazife olğanını ilân etti. Erdoğan rusiyeli zenaatdaşını «aziz dostum» dep adlandırdı ve eki devlet zararlanğan munasebetlerni yañıdan tiklep, olarnı daa eyi yapa bilecegini ilan etti.

Bu, eki prezidentniñ keçken sene noyabr ayında Moskva ve Ankara arasındaki munasebetler kerginleşkeninden soñ ilk körüşüvi oldı. O vaqıt Türkiye arbiy ava quvetleri Türkiye ve Süriye arasındaki sıñır yanında rusiyeli Su-24 cenk uçağını urdı. O zaman Rusiye Türkiyege qarşı sanktsiyalar kirsetti.

Amma keçken ay Türkiyede yüz bergen muvafaqiyetsiz avdarma ıntıluvından soñ Ankara, isyanda iştirak etkeninde şeklenilgen kişilerniñ qattı bastırılması içün Ğarp memleketleri tarafından takbih etilgeninden soñ, Moskvanen yaqınlaşıp başladı.

XS
SM
MD
LG