Qırım yarımadası sakinleri añlamaq kerek ki, Rusiye Federatsiyası Qırımda silâlaştırmanı devam etecek olsa, böyle etip, NATO boyunca ittifaqdaşlarğa telüke ketirip, AQŞ öz silâ mağazını işğal etilgen yarımada tarafına «nişanlay bile». Böyle fikirni Qırım.Aqiqat Radiosınıñ saba yayınında ukrain siyasetşınası, halqara munasebetler boyunca mütehassıs Nikolay Beleskov bildirdi.
«Telüke seviyesi yükselecek olsa, meselâ, NATO boyunca ittifaqdaşlar içün, oña qarşılıq köstermek içün AQŞ silâ mağazınıñ bir qısmı, yani özek silânen strategik taşıcılar, Qırımğa nişanlanması mümkün», – dep ayttı siyasetşınas.
Rusiye Federatsiyası mudafaa naziri Sergey Şoygu iyül 27-de Moskvada keçirilgen kollegiya toplaşuvında esabat berdi ki, işğal etilgen Qırım territoriyasında rusiyeli ordunıñ yeterli derecedeki taqımı bar. Onıñ fikrince, esasen bu «NATO-nıñ Şarqiy Avropada arbiy bulunmasınıñ ziyadeleşkeni, Ukrainadaki vaziyetnen» bağlıdır.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
