Ameldeki ükümetke boysunğan Qırım yarımadasınıñ «Krıminform» agentligi avgust 10-da bildirdi ki, «şimaliy Qırımda sıñırda ukrain keçirüv noqtaları işini yañıdan başladı».
Bunen beraber, neşirde «Çonğar» keçirüv noqtasını tanıp, Qırımnıñ Ukraianğa ait olğanını tasdıqladılar. «Krıminform» agentliginde hatırlattılar ki, Rusiye Fevqulade vaziyetler nazirligi Qırım baş idaresi «Çonğarğa» müessiseniñ hadimlerini «yarımada sıñırında adam aqını çoqlaşqanı munasebetinen» yolladı. Bundan evel rusiyeli Qırım ükümeti bu keçirüv noqtasını «Canköy» devlet halqara avtomobil keçirüv noqtası» dep adlandırğan edi.
İşğal etilgen Qırımnıñ ameldeki ükümetiniñ memuriy sıñırdaki vaziyet boyunca resmiy izaatları yoq.
Avgust 10-ğa keçer gecesi, saba saat 4:30-da rusiyeli taraf Ermeni Bazar yanındaki «Kalançak» keçirüv noqtasını bloktan azat etti, bu noqta avgust 7-den başlap çalışmadı.
Böyle etip, işğal etilgen Qırım ile memuriy sıñırda bütün üç keçirüv noqtası çalışa, dep bildire Ukraina Devlet sıñır hızmeti.
Qırım yarımadası ile memuriy sıñırda kritik vaziyet avgust 7-de saba başlandı, o vaqıttan berli rusiyeli taraf üç keçirüv noqtasında bir qaç sefer keçirüv rejimini deñiştire edi, de olarnı blok etip, de açıp. Evel olğanı kibi, rusiyeli taraf bunıñ sebebini añlatmay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
