Ukraina Devlet sıñır hızmetinde bildireler ki, eñ azdan yedi kişi işğal etilgen Qırım ile memuriy sıñırda rusiyeli mahsus hızmetlerniñ areketleri sebebinden beklep turğanları içün zararlandı.
«İşğalcilerniñ areketleri sebebinden yarımadadan çıqqan adamlarnıñ çoqusı bir künden ziyade memuriy sıñırdan keçip olamağan. Olarnıñ çoqusı yaramay alğa tüşe edi ve olarnıñ sağlığı yaramaylaşqanı qayd etilgen. Olarnıñ er birine nezaret noqtalarına kelgenleri vaqıtta ukrain sıñırcıları kerekli tıbbiy yardım köstergen edi. Bu kibi vaziyet eñ azdan edi kere yüz berdi. Çoqusı esli-başlı adamlar yaramaylaşqan, bazıları esini coyğan», – dep bildire avgust 10-da müessiseniñ matbuat hızmeti.
Avgust 10-ğa keçer gecesi, saba saat 4:30-da rusiyeli taraf Ermeni Bazar yanındaki «Kalançak» keçirüv noqtasını bloktan azat etti, bu noqta avgust 7-den başlap çalışmadı.
Böyle etip, işğal etilgen Qırım ile memuriy sıñırda bütün üç keçirüv noqtası çalışa.
Qırım yarımadası ile memuriy sıñırda kritik vaziyet avgust 7-de saba başlandı, o vaqıttan berli rusiyeli taraf üç keçirüv noqtasında bir qaç sefer keçirüv rejimini deñiştire edi, de olarnı blok etip, de açıp. Evel olğanı kibi, rusiyeli taraf bunıñ sebebini añlatmay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
