Qırımtatar Milliy Meclisi reisi Refat Çubarov Bütün dünya tamır halqlar kününe bağışlanğan beyanatında qayd etti ki, rusiyeli işğal şaraitinde keçken soñki eki yıl Qırım tamır halqaları olğan qırımtatarlar, qaraylar ve qırımçaqlar içün Birleşken Milletler Teşkilâtınıñ qanunında, BMT-niñ tamır halqlar aqları aqqında deklaratsiyasında qayd etilgen qaideler tarafından «pek telükeli» oldı.
«Rusiye Federatsiyası tarafından Qırımnıñ vaqtınca işğali şaraitinde yarımada tamır halqları olğan qırımtatarlar, qaraylar ve qırımçaqlar, öz medeniyetini saqlamaq, topraqlarını qorçalamaq içün faaliyetini serbest şekilde alıp barmaq imkânından bütünley marum etildi», – dep aytıla Meclis reisiniñ beyanatında.
Refat Çubarov, sözlerini tasdıqlamaq içün, Rusiyege boysunğan Qırım Yuqarı mahkemesi tarafından yarımada territoriyasında Meclis faaliyetiniñ yasaq etilmesi aqqında hatırlattı.
Bunen beraber, Çubarov qırımtatarlarnıñ qaçırılması ve öldürüvleri, rusiyeli uquq qoruyıcılarnıñ evler ve camilerge sürip kirmeleri, Qırımtatar Milliy Meclisi ve qırımtatarlarnıñ yerli öz-özüni idare etüv organlarınıñ azaları qanunsız yaqalavlar ve mahkeme davaları aqqında da hatırlattı.
Avgust 9-da Ukrainada Dünya tamır halqlar künü qayd etile. Kiyevde «Ukraina tamır halqları. Tarih, Zemaneviy vaqıt ve kelecek» mevzulı tögerek masa keçirildi.
2014 senesi mart 20-de Ukraina Yuqarı Radası öz beyanatında qırımtatarlarnı tamır halqı olğanını tanıdı ve olarnıñ Ukraina çerçivesinde öz-özüni idare etüv aqqını kefil etti. Amma tamır halqı olaraq qırımtatar halqınıñ aq-uquqları yañıdan tiklenilmesi aqqında qanun öyle de qabul etilmedi – 2014 senesi oña kerek olğan 226 deputattan tek 115 kişi qol tuttı.
