Rusiyege boysunğan Qırım Yuqarı mahkemesi «Hizb ut-Tahrir işi» boyunca yaqalanğan Enver Mamutov ve Remzi Memetovnıñ apiste bulunma müddetiniñ uzattırılmasına qarşı şikâyet arizasını qanaatlendirmedi. Bu aqta olarnıñ adliyecisi Emil Kurbedinov bildirdi.
«Qırım Yuqarı mahkemesi Enver Mamutov ve Remzi Memetovnıñ apiste bulunma müddetiniñ uzattırılmasına qarşı şikâyet arizasını qanaatlendirmedi! Elbet, appelânt ve adliyecilerniñ bildirgen delillerine baqmadan, red etildi!» – dep yazdı o Facebook saifesinde.
İyül 22-de aynı bu mahkeme Enver Mamutov ve Remzi Memetovnı, bunen beraber Zevri Abseitovnı ve Rustem Abeltarovnı apiste qaldırdı. Olar mayıs 12-de Bağçasarayda yaqalandı. O vaqıt rusiyeli uquq qoruyıcılar musulmanlarnıñ evlerinde ve yerli qavehanede bir sıra tintüvler keçirdi. Neticede, dört Bağçasaray sakini yaqalandı ve terrorizmde qabaatlandı: Zevri Abseitov, Remzi Memetov, Rustem Abeltarov ve Enver Mamutov. Olar FSB hadimleri tarafından Rusiyede terroristik teşkilâtı olaraq tanılğan «Hizb ut-Tahrir» teşkilâtında iştirak etkenlerinde şeklenilip yaqalandı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
