Rusiyege boysunğan Aqmescit akimiyeti bildire ki, GİBDD (Yol areketi havfsızlığı devlet inspektsiyası) hadimleri yolcu naqliyesini profilaktika maqsadınen teşkere.
«2016 senesi avgust 8-den 31-ge qadar yolcu naqliyesinde qaza havfı seviyesini eksiltmek maqsadınen Aqmescit boyunca Rusiye GİBDD bölügi tarafından profilaktika tedbirleri kompleksi keçirile», – dep aytıla Aqmescitniñ rusiyeli akimiyetinde.
Añlatılğanına köre, profilaktika tedbirleriniñ esas vazifeleri budır: saruş alda aydağanlarnı belgilemek, aydavcılarnıñ tıbbiy taraftan seferden evel baqılmasını nezaret etmek, tehnikiy taraftan sındırılğan naqliyeni belgilenmek, yolcularnı taşığan aydavcılar tarafından yol areketi qaideleri bozulmasını belgilemek.
Bazar kününden başlap, Qırımda blokpostlar qoyulıp başladı. Bazarertesi künü bu kibi blok post Aqmescitke kiriş yanında peyda oldı.
Yolcularnıñ Qırım.Aqiqatqa bildirgen malümatına köre, GİBDD ve silâlı OMON hadimleri avtobuslarnı toqtata, aydavcılarnıñ vesiqalarını baqa, naqliyeni – yolcu salonını – tıştan ve pencerelerden baqıp çıqa.
Qırım yarımadası ile memuriy sıñırda kritik vaziyet avgust 7-de saba başlandı, o vaqıttan berli rusiyeli taraf bunıñ sebebini añlatmay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
