Qırımtatar Milliy Meclisi reisiniñ muavini İlmi Umerovğa qarşı mahkeme psihiatrik ekspertizanıñ keçirilmesi meselesi boyunca mahkeme toplaşuvı avgust 11-ge belgilendi. Bu aqta apiste bulunğan Ahtem Çiygoznı imaye etken rusiyeli adliyeci Nikolay Polozov bildirdi.
«Teneffüste (Ahtem Çiygoz boyunca mahkemede – QA) belli oldı ki, İlmi Umerovğa qarşı mecburiy psihiatrik ekspertiza aqqında mahkeme keçirilmesi belgilendi», – dep yazdı Polozov Twitterde.
Adliyeci mahkemege celpnameni paylaştı, vesiqağa binaen, İlmi Umerov «toplaşuvda iştirak etmek içün özü kelmek kerek».
Qırımtatar Qurultayı Merkeziy saylav komissiyasınıñ reisi Zair Smedlâyevniñ bildirgenine köre, İlmi Umerov FSB-de sorğudan keçirildi, o yerde oña avgust 11-ge celpname berildi.
Umerov, Kremlge boysunğan Aqmescitteki Kiyev rayon mahkemesine oña qarşı cinaiy iş açılması aqqında qararğa qarşı şikâyet arizasını berdi. Bunen beraber, o, FSB taqiqatçısı adına ambulatoriyada mahkeme-psihiatrik ekspertizadan öz isteginen keçmege red etkeni aqqında arizanı berdi, bunı şahısnı itibardan tüşürme ve iş adı-sanını aşalama ıntıluvı olaraq körgenini bildirdi.
Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.
«Memorial» rusiyeli uquq qoruyıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
