Link açıqlığı

Rusiye içinde seferleri boyunca hızmet etken Aqmescit ava limanı üç millioncı yolcunı qabul etti. Bu aqta şirketniñ matbuat hızmetinde bildireler.

«Yubiley yolcu Tuzovskaya Natalya oldı, o Pegas fly avia şirketiniñ seferinen keldi... Natalyağa «Pegas fly» şirketi ve Aqmescit ava limanından hatıra ediyeleri taqdim etildi, bundan da ğayrı, oña ava limanı biznes zalında bedava hızmetler almaq içün sertifikat berildi», – dep aytıla beyanatta.

Ava limanında qayd eteler ki, uçaq seferleriniñ sayısı ziyadeleşkeni «yolcularnıñ sayısı artqanına bağlıdır». Böyle etip, müessiseniñ malümatına köre, 2014 senesi aynı müddet devamında (yanvar 1-den avgust 8-ge qadar) 1 305 789 yolcu, 2015 senesi ise 2 867 486 yolcu qabul etildi.

İşğal etilgen Qırımda seferlerniñ keçiktirilmesi iyül 18-de başlandı, o vaqıt «VİM AVİA» şirketiniñ yolcuları Aqmescit ava limanında bir künden ziyade seferni bekledi. Bunı tehnikiy meselelernen añlatqan ediler. Privoljskaya naqliye prokuraturasında bildirdiler ki, «VİM AVİA» şirketine qarşı daimiy ve çarter ava seferleriniñ kütleviy şekilde keçiktirilmesi içün memuriy uquq bozuvı aqqında iş açıldı.

2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG