İşğal etilgen Qırım ile memuriy sıñırda kergin vaziyet devam ete. Tek bir dane keçirüv noqtası – «Çonğar» – eki tarafqa çalışa, bu yerde adamlar nevbette 12 saat ve ziyade tura. Bu aqta şaatlar bildire.
Bir tarafaqa – yarımada yönelişinde – «Çaplinka» keçirüv noqtası çalışmağa devam ete. Rusiyege boysunğan Qırım gümrügi saytında avgust 9-da yañı malümat bildirilmegen. Avgust 8-de, saat 17:00-de bildirildi ki, «Çaplinka» ve «Çonğar» pek meşğul degil, «Kalançak» ise meşğul.
Qırım yarımadası ile memuriy sıñırda kritik vaziyet avgust 7-de saba başlandı, o vaqıttan berli rusiyeli taraf bunıñ sebebini añlatmay. Bunen beraber, keçirüv noqtalarınıñ işi ne vaqıt bütünley tizilecegi belli degil.
Keriç parom keçitinde de büyük nevbetler bar. Şaatlarnıñ bildirgenlerine köre, bazı insanlar nervalana.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
