Sentâbr 12-de qayd etilecek musulman Qurban bayramı Qırımda raatlıq künü ilân etildi.
Kremlge boysunğan Qırım yolbaşçısı Sergey Aksönovnıñ mütenasip fermanı yarımada ükümetiniñ saytında yerleştirildi.
«Qurban bayramı munasebetinen 2016 senesi sentâbr 12 kününi raatlıq bayram künü olaraq ilân etmek. Qırım Cumhuriyeti devlet ükümetiniñ icra organlarınıñ yolbaşçılarına sentâbr 12 raatlıq künü işçilerniñ nevbetlerini teşkil etmek», – dep aytıla vesiqada.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
