Qırımda tünevin qoyulğan blokpostlar alâ daa tura, rusşyeli uquq quruyıcılar avtobuslarnı toqtata ve teşkere. Hususan, Aqmescitte böyle blokpost ava limanına buruluşta teşkil etilgen. Yolcu şaatlarnıñ Qırım.Aqiqatqa bildirgen malümatına binaen, avtobuslarnıñ teşkerilmesi yarımadanıñ esas yollarında keçirile.
GİBDD (Yol areketi havfsızlığı devlet inspektsiyası) ve silâlı OMON hadimleri avtobuslarnı toqtata, aydavcılarnıñ vesiqalarını baqa, naqliyeni – yolcu salonını – tıştan ve pencerelerden baqıp çıqa.
Qırım yollarında içinde zırhlı yeleklernen hadimleri olğan çoq GİBDD maşnaları bar.
Bunen beraber, yarımada sakinleriniñ bildirgenlerine köre, memuriy sıñırda kollapsqa baqmadan, taksistler «Çonğardan» Hersondaki Novoalekseyevkağa barmağa teklif etmege devam ete.
Avgust 7-de saba Ukraina Devlet sıñır hızmetinde bildirdiler ki, rusiyeli hızmetler Qırım toprağında, sebeplerni añlatmayıp, yolcular ve naqliyeniñ memuriy sıñırdan keçüvini toqtattı. Bir qaç saattan soñ rusiyeli taraf Canköyde («Çonğar») memuriy sıñırda areketni qısmen yañıdan başlattı. Avgust 8-de de vaziyet kergindir.
Rusiye kütleviy haber vastaları, resmiy malümat olmadan, Qırım ile memuriy sıñırda sanki yüz bergen atışma aqqında bildirmege başladı. Bunen beraber, işğal etilgen yarımada territoriyasında Ukraina silâlı quvetleri diversantlarınıñ sanki yapılğan areketleri aqqında malümat peyda olğan edi.
Yarımada sakinleri Qırım boyunca blokpostlar qoyulması aqqında bildirgen edi. Bundan soñ yarımadada qaçqan silâlı qaçaq askerler qıdırlığanı aqqında tasdıqlanmağan malümat peyda oldı.
Rusiye tarafı bu vaziyetke alâ daa izaat bermedi.
