Rusiye, sentâbr ayına planlaştırılğan «Şimali Qavqaz – 2016» arbiy ögrenüvleri keçirilecek vaqtında cenübiy-ğarbiy yönelişte ücüm areketlerini işlep baqacaq, bunıñ içün olarnıñ (ögrenüvlerniñ – QA) Ukrainağa qarşı ücüm ameliyatına keçe bilmesi telükesi bar.
Böyle fikirni Qırım.Aqiqat Radiosınıñ saba yayınında Halqara meseleler boyunca ordu, konversiya ve silâsızlanuv tedqiqatı ukrain merkeziniñ müdir muavini Mihail Samus bildirdi.
«Ücüm areketleri, yani Ukraina tarafına ücüm areketleri ögretilecek. Başqa taraftan, bu ögrenüvler ücüm ameliyatına keçe bilemi, eken. Söz arası, bugün avgust 8. Hatırlaymız ki, aynı bu kün ameliyat (Gürcistanda arbiy zorbalıqnıñ başlanması – QA) «Qavqaz-2008» ögrenüvlerden başlandı. Muqayese doğrudır. Biz, meselâ, Ukraina civarında bütün yönelişlerde, tek Qırım degil de, Donbass, Kiyev yönelişlerinde taqımlarnıñ çoqlaşmasını qayd etemiz», – dep ayttı ekspert.
Ukraina Baş ştabı spikeri Vladislav Seleznöv tünevin bildirdi ki, Ukraina Silâlı quvetler Baş ştabınıñ elinde işğal etilgen Qırım ile memuriy sıñırda yüz bergen vaziyet aqqında operativ malümat bar. Onıñ sözlerine binaen, arbiy analitikler vaziyetni ögrene.
Qırımtatar Milliy Meclisi reisiniñ birinci muavini Nariman Celâl avgust 7-de Qırımnıñ şimalinde büyük rusiyeli asker taqımları aqqında bildirdi. Onıñ malümatına binaen, Canköy bütünley rusiyeli askerlernen sarımğa alındı. Arbiy tehnikanıñ çoqşalması Keriçte de köründi. Yarımada sakinleri Qırım.Aqiqatqa Qırımnıñ bazı regionlarında blokpostlarnıñ qoyulması aqqında ayttı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
