Link açıqlığı

Qırımtatar Milliy Meclisi reisi Refat Çubarovnıñ tahmin etkenine köre, Rusiye ve Türkiye prezidentleri Vladimir Putin ve Recep Tayyip Erdoğannıñ avgust 9-da keçirilecek körüşüvinde Rusiye tarafını tutqan qırımtatarlar da buluna bile.

«İstisna degil ki, Rusiye tarafı, Türkiye ve Rusiye yolbaşçılarınıñ körüşüvi onıñ Türkiyege qarşı «ğalebesi» olacaq dep tüşünip, endi prezident Erdoğanğa bazı sürprizlerni azırlay, meselâ, resmiy eyyetine qırımtatar kollaborantlarınıñ kirsetilmesi...», – dep yazdı o Facebook saifesinde.

«Eñ azdan, elde etkenimiz malümatqa binaen, bir-eki qırımtatar kollaborantı, olar içün azırlanılğan metinlerni aşıqıp ezberley...» – dep qayd etti Çubarov.

Meclis reisiniñ fikrince, taraflar, olarnıñ noqta-i nazarları ayrı olğan meseleler boyunca, meselâ, qırımtatar halqınıñ vaziyeti boyunca halq ögünde açıq muzakerelerden şimdilik uzaq turacaqtır.

Bu malümat diger menbalarda tasdıqlanılmay.

Bundan evel bildirilgen edi ki, prezident Erdoğan rusiyeli zenaatdaşınen avgustnıñ birinci qısmında körüşecek. Bu, iyün ayınıñ soñunda Erdoğannıñ türkiyeli askerler tarafından urulğan rusiyeli arbiy uçaq içün afu sorağanından soñ eki devlet arasındaki munasebetler eyileşken vaqtından olarnıñ ilk körüşüvi olacaqtır.

XS
SM
MD
LG