Qırım kurort şeerlerinde akimiyet bergi hızmetine öz şahsiy evlerini kirağa bergen mülkiyetçiler aqqında bildirmek mecbur. Bu aqta Kremlge boysunğan Qırım kurort ve turizm naziri Sergey Strelbitskiy yarımadada turizm inkişafı meseleleri boyunca iş gruppası toplaşuvında ilân etti, dep bildire müessiseniñ matbuat hızmeti.
«Kurort mevsimi meselelerinden biri, kira boyunca hızmetler taqdim etken obyektlerniñ aydınlatılmasıdır. Bu mesele er keske bağlı, bunıñ içün belediyeler, qanunsız çalışqan vatandaşlarnıñ cedvelini tizmek maqsadınen, bergi hızmetlerinen faal işbirlik tutmalı. Ümüt etem ki, 2017 senesi yanvar 1-den kirağa ev bergen fizikiy şahıslar içün patent bergi sisteması çalışıp başlaycaq, bu ise, şahsiy bölükniñ işini qanuniy yapmağa yardım etecektir», – dep ayttı Sergey Strelbitskiy.
Onıñ qayd etkenine köre, şahsiy bölükniñ qanunlaştırılması içün biznes qayd etilmesi ve alıp barılması boyunca yahşı şarait olmaq kerek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
