Link açıqlığı

Qırımda «Krım SOS» saytı blok etildi


Rusiye tarafından işğal etilgen Qırımda «Krım SOS» cemaat teşebbüsi saytına kiriş blok etildi. Teşkilâtnıñ tesisçilerinden biri Alim Aliyevniñ bildirgenine köre, bu aqta avgust 5-te aqşam belli oldı.

«Yarımadanıñ çeşit köşelerinden krymsos.com saifesine kirgen qullanıcılar soratılğan resursqa kiriş sıñırlı olğanı aqqında beyanatnı köre. Bunen beraber, yasaqlanğan saytlar resmiy cedvelinde krymsos.com saytı şimdi yoq», – dep bildire «Krım SOS» haber resursı Qiriminfo.

Provayder sıñırlanmanıñ eki tahmin etilgen sebepni bildire: ağ adresinde Rusiye Federatsiyasında tarqatılması yasaq olğan malümat bar ve mahkeme qararınen ya da Rusiye qanunlarınen belgilengen diger sebeplerden.

Avgust 1-de Radio Svobodanıñ leyhası olğan Qırım.Aqiqat saytı Rusiye tarafından işğal etilgen Qırımda qısmen blok etildi. Bir sıra provayderler saytqa kirişni blok etti. Avgust 2-de yarımadada «Çernomorka», «ATR», «Sobıtiya Krıma» saytları blok etilip başladı. Bu saytlar yarımada regionlarınıñ çoqusında qısmen blok etile. Şimdiki vaqıtta Qırım.Aqiqat saytını Yaltada ve qomşu Rusiyede açmaq mümkün.

Rusiyeli Qırım prokurorı Natalya Poklonskaya Radio Svobodanıñ leyhası olğan Qırım.Aqiqat saytı Rusiye tarafından işğal etilgen Qırımda Kremlge boysunğan yarımada prokuraturasınıñ vesiqalarına binaen blok etilgenini bildirdi.

«Krım SOS» cemaat teşebbüsi 2014 senesi fevral 27-de göñülliler tarafından Qırımda olıp keçken vaqialarnı operativ ve obyektiv şekilde bildirmek içün Facebook saifesi olaraq meydanğa ketirildi.

Bundan soñ teşkilât Qırım ve Donbasstan köçkenler içün yardım köstermege başladı. Teşkilât köçkenlerge içtimaiy ve uquqiy yardım köstere, Qırımdaki vaqialar aqqında haberdar ete, içtimaiy adaptatsiya programmaları, köçkenlerniñ yerli cemiyetleriniñ inkişafı, adliyeci leyhaları, mecburen köçken şahıslarnıñ mahkeme işleriniñ refaqatınen oğraşa.

XS
SM
MD
LG