Rusiyege boysunğan Qırım ükümeti yarımada şeer ve rayonlarında mektep talebeleri içün eşyalarnıñ keniş satılmasını ilân etti. Bu aqta yarımada rusiyeli ükümetiniñ matbuat hızmeti bildire.
«Şimdiki vaqıtta Qırım cumhuriyeti regionlarında 17 mektep bazarı ve 2 yarmalıq işini başladı. Mektep mallarınıñ çeşitleri 229 tükânda, 336 bölükte, 153 kiosk ve çadırda satılacaq. Bazarlarda mektep urbası, ayaqqap, kantselâriya malları ve meşin galantereya (arqa çantaları, çantalar ve ilâhre) satılması içün 436 ticaret yeri ayırıldı», – dep aytıla beyanatta.
Qırım kütleviy haber vastalarınıñ malümatına köre, bu sene balanı mektepke azırlamaq içün tahminen 10 biñ ruble kerek olacaq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
