Avgust 9-da Ukrainada Dünya tamır halqlar künü qayd etilecek, bunıñ çerçivesinde bir sıra merasimlerniñ, bu cümleden «Ukraina tamır halqları. Tarih, Zemaneviy vaqıt ve kelecek» serlevalı halqara konferentsiyanıñ keçirilmesi planlaştırıla.
Bu aqta avgust 5-te Kiyevde keçirilgen matbuat konferentsiyasında Ukraina haber siyaseti naziriniñ birinci muavini Emine Ceppar bildirdi.
«Tögerek masa ya da konferentsiya çerçivesinde tamır halqlar zemaneviy dünyada, tamır halqlarnıñ etnik gruppaları olaraq hususiyetleri, zemaneviy devletlerde tamır halqlar meseleleriniñ çezüv yolları, tamır halqlar meseleleri boyunca halqara uquq inkişafı, Birleşken Milletler Teşkilatınıñ dünya tamır halqları birinci ve ekinci yüzyılı kibi mevzular muzakere etilecek», – dep añlattı Ceppar.
Onıñ malümatına binaen, bu merasimge BMT tamır halqlar meseleleri boyunca daimiy Forumınıñ azası Oliver Loode ve estoniyalı parlamentariy Mart Nyüt kelecek, olarnen beraber Ukraina haber siyaseti nazirligi qırımtatar halqınıñ cemaat ögünde diplomatiyası strategiyası boyunca leyhanı ömürge keçirecek.
İşbu merasimler çerçivesinde qayd etilgen strategiya, bunen beraber, ukrain ve qırımtatar halqları arasındaki tarihiy munasebetler aqqında pyesa taqdim etilecek.
Avgust 9-da qayd etilgen Halqara dünya tamır halqları künü 1994 senesi Birleşken Milletler Teşkilatı Baş Assambleyası tarafından belgilendi.
Seyyarede tamır halqlarnıñ umumiy sayısı tahminen 370 million insannı teşkil ete, olar 70-ten ziyade devlette yaşay ve çeşit til ve medeniyyetlerni temsil ete.
