Link açıqlığı

Silâlı uquq qoruyıcılar «Divan» qırımtatar qavehanesine keldi – Çubarov


«Divan» qavehanesi yanında silâlı uquq qoruyıcılar, 2016 senesi, avgust 5

Avgust 5-te Aqmescitte silâlı uquq qoruyıcılar «Divan» qırımtatar qavehanesine keldi. Bu aqta Qırımtatar Milliy Meclisi reisi Refat Çubarov Facebook saifesinde bildirdi.

«Bu daqqalar Aqmescitte şeer merkezindeki populâr qırımtatar «Divan» qavehanesine maski-şou keldi. Olar içki azbarçıqta toplaşa... Demek ki, olıp keçken vaqia Gorkogo soqağında kezgenlerden saqlanıla», – dep ayttı Çubarov.

Rusiyeli uquq qoruyıcılarnıñ resmiy saytlarında Aqmescitte keçirilgen er angi operativ tedbirler aqqında malümat yoq.

İşğal etilgen Qırımda silâlı insanlarnıñ tarafından keçirilgen tintüvler sıq ola. Mayıs 12-de Bağçasarayda rusiyeli uquq qoruyıcılar musulmanlarnıñ evlerinde ve yerli qavehanede bir sıra tintüvler keçirdi. Neticede, dört Bağçasaray sakini yaqalandı ve terrorizmde qabaatlandı: Zevri Abseitov, Remzi Memetov, Rustem Abeltarov ve Enver Mamutov. Olar FSB hadimleri tarafından Rusiyede terroristik teşkilâtı olaraq tanılğan «Hizb ut-Tahrir» teşkilâtında iştirak etkenlerinde şeklenilip yaqalandı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG