Link açıqlığı

Koktebel Jazz Festival Halqara muzıka festivali Qırımdan qıtaiy Ukrainağa köçti, amma teşkilâtçılar yarımadağa onıñ işğalden azat etilmesinden soñ qaytmağa ümüt ete. Bu aqta Qırım.Aqiqat Radiosınıñ saba yayınında Koktebel Jazz Festival prezidenti Liliya Mlinariç bildirdi.

«Biz bunı pek arzu etemiz. Taqımımız qırımlı, art-müdirimiz Qırımdan, ve Qara Dağ gecelerine qaytmağa hayal etemiz. Onı pek sevemiz, bizim içün bu yerniñ ayrı emiyeti bar. Ve bu yerge, Ukrainada olacağımızdan soñ, kene qaytmağa hayal etemiz», – dedi o.

Qırım Rusiye tarafından işğal etilgen soñ Koktebel Jazz Festivali mecburen Ukrainanıñ qıtaiy qısmında, evel merasim keçirilgen Köktebel köyünden uzaqta, keçirile. Teşkilâtçılarnıñ aytqanına köre, endi bu yerge belli ecnebiy artistlerni ketirip olamaylar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG