Qırım adliyecisi Emil Kurbedinov qayd ete ki, avgust 4-te 13 kişi o zenaatdaşlarınen çalışqan ofiske sürip kirmege tırışqan edi. Şaatlarnıñ malümatına binaen, belgisiz insanlardan bazılarınıñ rusiyeli Federal havfsızlıq hızmeti hadimleri olğanını tanıdılar, dep ayttı Kurbedinov.
«Grajdanlıq urbağa kiyingen eñ azdan 13 insan bugün, avgust 4-te, menim ve diger adliyecilerniñ adliyeci dosyeleri bulunğan, bunen beraber, içinde adliyeci sırları olğan malümatlarnen tehnika olğan binağa sürip kirmek ıntıluvında iştirak etti! Şaatlarnıñ bildirgenlerine köre, belgisiz insanlardan bazılarınıñ FSB hadimleri ve ekstremizmge qarşılıq kösterüv merkeziniñ hadimleri olğanlarını tanıdılar. Bu adamlar binağa kirgen internet tellerini pek qarıştıra edi», – dep yazdı adliyeci Facebook saifesinde.
Bundan evel adliyeci, Rostov-na-Donu şeerinde keçirilgen mahkemede bulunıp, qırımtatarlarnıñ adliyecileri çalışqan Aqmescit ofisine belgisiz şahıslarnıñ kirmek ıntıluvı aqqında bildirdi. Binada eki yardımcı qız bar edi, olar içinden qapatıldı. Olar politsiyağa muracaat etmedi, çünki bu, adliyecilerniñ fikrince, vaziyetni kerginleştire bile.
Kurbedinovnıñ bildirgen malümatı boyunca, Qırımda uquq qoruyıcı organlarınıñ resmiy izaatları yoq.
Rostov-na-Donu şeerinde «Hizb ut-Tahrir» teşkilâtınen bağlı olğanında qabaatlanğan dört Qırım musulmanı mahküm etile. Olarnıñ imayecileri Emil Kurbedinov ve Edem Semedlâyev ola.
Kurbedinov bergen malümatqa köre, avgust 4-te Şimaliy Qavqaz okrug arbiy mahkemesi, imayeniñ narazılığına baqmadan, dört Qırım musulmanınıñ «Hizb ut-Tahrir» teşkilâtında iştirak etkenlerinde qabaatlav boyunca mahkeme taqiqatını aqiqaten yekünledi. Nevbetteki toplaşuvnıñ keçirilmesi avgust 16-ğa belgilendi.
