Link açıqlığı

Aqyar civarındaki dağda yanğın bir gektar ormannı yoq etti – Rusiye Fevqulade vaziyetler nazirligi


Terekke yaşın urulması, Aqyar civarında Qurt-Qaya dağındaki ormanda yanğın sebebi oldı. Bu aqta Rusiye Fevqulade vaziyetler nazirligi (FVN) Qırım idaresiniñ matbuat hızmeti bildire.

«Ateş quru otta tez yayılmağa başladı ve 1 gektar topraqnı qaplap aldı. Yanğın yüz bergen yerge mahsus naqliyenen irişmek imkânsız edi. Qurtarıcılar dağlıq yerlerde töpege öz küçünen çıqa edi, yanğın avtotsiternaları Qurt-Qaya eteginde buluna edi. Yanğıncılarğa yardım köstermek içün Rusiye FVN vertolötı keldi, o yanğın zonasında sekiz kere suv attı», – dep qayd ettiler müessisede.

Qurtarıcılarnıñ bildirgenlerine köre, ormanda ateşniñ yayılmasına yol berilmedi.

Rusiye tarafından işğal etilgen Qırımda bir aydan ziyade yanğın havfı ilân etilgen. Bundan da ğayrı, bu afta devamında yarımadada er kün şiddetli yağmurlarnen furtuna havfı ilân etile.

XS
SM
MD
LG