Qırımda Rusiye uquq qoruyıcıları tarafından taqip etilgen bir sıra qırımtatarlarnıñ imayecisi olğan adliyeci Emil Kurbedinov bildire ki, Aqmescitte belli olmağan şahıslar o zenaatdaşlarınen beraber çalışqan ofisine kirmege tırışa.
«Şimdiki vaqıtta belli olmağan şahıslar, tahminlerge köre uquq qoruyıcılar, men çalışqanım Vorovskogo soqağındaki adliyeciler ofisine kirmege tırışa. Men Rostovda bulunam», – dep yazdı o Facebook saifesinde.
Adliyeci diger malümatnı bildirmedi. Qırım.Aqiqat tafsilâtlı malümatnı ögrenmege tırışa, amma şimdiki vaqıtta adliyecilerniñ telefonları cevap bermey.
Kurbedinovnıñ bildirgen malümatı boyunca Qırımda uquq qoruyıcı organlarınıñ resmiy izaatları yoq.
Emil Kurbedinov Rostov-na-Donu şeerinde buluna, o yerde «Hizb ut-Tahrir» teşkilâtınen bağlı olğanında qabaatlanğan dört Qırım musulmanı mahküm etile.
Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
