Rusiye tarafından işğal etilgen Qırımda Aluşta rayonındaki Tuvaq (Rıbaçye) köyünde rusiyeli cinaiy-icra sistemasınıñ hadimleri içün «Gornıy» («Dağlı») istiraat evi açıldı, dep bildire Qırım ve Aqyar boyunca Rusiye Cezalarnıñ ömürge keçirilmesi federal hızmeti idaresiniñ matbuat hızmeti.
«Pansionatta temelli tamir işleri yapıldı ve cinaiy-icra sistemasınıñ hadimleri ve olarnıñ qoranta azaları içün üç türlü musafirhane odaları taqdim etildi. Bütün odalar kerekli mefruşat ve ava suvutqan aletlernen teminlengen», – dep aytıla müessiseniñ beyanatında.
Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.
Ukraina haber siyaseti naziriniñ birinci muavini Emine Cepparnıñ keçken afta bildirgenine köre, Rusiye tarafından işğal etilgen Qırımda 24 siyasiy mabus, 16 belgisiz ğayıp olğan kişi ve repressiyalardan 10 elâk olğan insan oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
