Link açıqlığı

Keriç keçitinde üç millionlı yolcu qabul etilgenini bildireler


«Deñiz müdirligi» Keriç parom keçitiniñ operatorı qayd ete ki, onıñ hızmetlerini üç milliondan ziyade yolcu qullandı. Müessise matbuat hızmetiniñ bildirgenine köre, «Qırım» limanında üç millonlı yolcunı qarşıladılar.

«Yubiley yolcu Svetlana Mihaylük oldı, o Qırım limanına «Protoporus IV» adlı paromnen keldi, o yerde tantanalı merasim keçirildi ve «Deñiz müdirligi Keriç parom keçiti» hatıra yarlığı taqdim etildi», – dep qayd etile beyanatta.

Bunen beraber, müessisede qayd ettiler ki, Keriç parom keçitiniñ keçirüv qabiliyetiniñ eñ yüksek noqtasına irişilmedi. Beyanatqa köre, raatlıq künleri keçit küçleriniñ yarımından biraz ziyade çalıştı.

«Deñiz müdirliginde» bildirdiler ki, cedvel deñişmesi keçitniñ keçirüv qabiliyetini yüksletmege, ve 2016 senesi turistik mevsiminiñ töpe noqtasında, 2015 senesi turistik mevsimine baqqanda, bekleme vaqtını qısqartmağa yardım etti. Şimdiki vaqıtta ayrı paromlar vastasınen künde 14 eki taraf seferi yapıla.

Tünevin Kremlge boysunğan yarımada ükümetiniñ kurort ve turizm naziri Sergey Strelbitskiy bildirdi ki, işğal etilgen Qırımnı yıl başından 2,6 million turist ziyaret etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG