Daa üç Qırım musulmanınen beraber, «Hizb ut-Tahrir» teşkilâtınen bağlı olğanında qabaatlanıp Rostov-na-Donu şeerinde mahküm etilgen Ruslan Zeytullayevni kantserge oturttılar. Bu aqta adliyeci Emil Kurbedinov bildire.
Onıñ malümatına binaen, Zeytullayev bildirdi ki, endi beş kün devamında, «onıñ ar-namusını aşalağan areketlerni yapmağa red etkeni içün, ve İslâm qanunlarını bozmağa red etkeni içün», kantserde otura.
«Soñki mahkeme toplaşuvından soñ, Rostov-na-Donu taqiqat izolâtorına kelgen soñ SİZO memuriyeti Ruslandan, teşkerüv keçirmek içün, bütünley soyunmasını talap ettiler. Ruslan tüp urbasına qadar soyundı, amma bütünley soyunmağa red etti», – dep añlattı Kurbedinov.
Adliyeciniñ qayd etkenine binaen, diniy mefkürege köre, İslâm qanunlarına binaen, diger şahıslar ögünde, bir cınıs olsa da, tolusınen soyunmaq yasaqtır. Bunen beraber, o qayd ete ki, teşkerüvniñ böyle tarzı insannıñ ar-namusını aşalay, ve bu vaziyette delilsiz ola.
«Normal insanğa bunı yapqanlarnı añlamaq qıyındır. Bu iş boyunca dört qabaatlanğan kişi em kameralarda, em de olardan tış nezaret astında buluna. Bunıñ içün, anda kimse bir şey keçirip, saqlap, teslim etip olru, dep aytmaq mümkün degil. Em de böyle şeyler yapması kimseniñ aqlına kelmey, tek balalarğa apaylarından destek mektübini teslim etmek», – dep ayttı Kurbedinov.
Avgust 2-de, salı künü Rostov-na-Donu şeerindeki Şimaliy Qavqaz okrug arbiy mahkemesinde «Hizb ut-Tahrir» teşkilâtınen bağlı olğanında qabaatlanğan Qırım musulmanları – Ruslan Zeytullayev, Rustem Vaitov, Nuri Primov ve Ferat Sayfullayev – işi boyunca nevbetteki mahkeme toplaşuvı keçirildi. Amma mahkeme ekspertniñ video bağını diñlep olamadı. Qabaatlanğanlarnıñ imayecileriniñ malümatına binaen, işniñ baqılması avgust 3-te saat 11.00-de devam etecek.
Olar 2015 senesi qışta Aqyarda yaqalandı. Mayıs ayında olarnıñ apiste bulunma müddeti oktâbr ayına qadar uzattırıldı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
