Link açıqlığı

Qırım Devlet milletlerara munasebetler komitetinde bitirilmegen qurucılıq obyektlerinen ne yapacaqlarını bilmeyler


İllüstratsiya fotoresimi

İşğal etilgen Qırım toprağındaki bitirilmegen qurucılıq obyektleri Moskvağa boysunğan yarımada ükümetiniñ Milletlerara munasebetler ve sürgün etilgen vatandaşlar meseleleri boyunca Devlet komitetiniñ diqqatını celp etti. Bu obyektler kelecekte qullanabilecegi aqqında müessiselerara komissiyanıñ toplaşuvında söz yürsetildi.

«Komissiya toplaşuvında qabul etilgen qararlarnıñ neticelerine binaen, bitirilmegen qurucılıq obyektleri qullanılması boyunca tekliflerniñ kirsetilmesi içün Qırım cumhuriyeti belediye müessiseleri avgust 15-ke qadar belediye rayonı (şeer okrugı) territoriyasında yerleşken obyektlerniñ teşkerilmesini keçirecek ve Qırım cumhuriyeti Milletlerara munasebetler ve sürgün etilgen vatandaşlar meseleleri boyunca Devlet komitetine olarnıñ kelecek qullanılması (qurucılıqnıñ bitirilmesi, kommunal mülkiyetine teslim etilmesi ya da yazıp alması) boyunca tekliflerini taqdim etecek», – dep bildire Devlet milletlerara komitetiniñ matbuat hızmeti.

Kremlge boysunğan Qırım parlamenti yolbaşçısınıñ muavini Remzi İlyasov bundan evel bildirdi ki, sürgün etilgenler içün evler qurmasına bu sene ayırılğan bücet parası qullanılmayıp qala bile. İlyasov, kelecek sene sürgün etilgenler içün iç bir obyekt qurulmaycaq, dep qorqqanını bildirdi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG