Rusiyege boysunğan Qırım ükümetinde yañı naqliye naziri belgilendi. Bu vazifege Anatoliy Volkov tayinlendi.
Rusiyeli Qırım yolbaşçısı Sergey Aksönovnıñ mütenasip fermanı Qırım Nazirler şurasınıñ saytında yerleştirilgen.
«Volkov Anatoliy Anatolyeviçni Qırım Cumhuriyeti devlet vazifesine – Qırım Cumhuriyeti naqliye naziri vazifesine tayinlemek», – dep aytıla fermanda.
Bunen beraber, Aksönov Yelizaveta Kojiçevanı Qırım sport naziriniñ birinci muavini vazifesine, Valeriy Gonçarovnı ise, Qırım emek boyunca inspektsiyası yolbaşçısınıñ muavini vazifesine tayinledi, o aynı vaqıtta Qırımda baş devlet emek inspektorınıñ muavini olacaqtır.
İyül soñunda Aksönov bazı nazirliklerniñ muavinleri arasında deñişmeler kirsetti.
Bundan evel o, Qırım kurort naziriniñ muavini Rustem Tagarovnı işten boşattı. Bunen beraber, Qırım Naqliye nazirliginiñ yolbaşçısı Andrey Bezsalov, Meskün-kommunal hocalığı naziri Aleksandr Jdanov ve onıñ birinci muavini Aleksey Boçarov istifağa çıqarıldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
