Link açıqlığı

Rusiyege boysunğan Qırım Yuqarı mahkemesiniñ toplaşuvında prokuror Qırımtatar Milliy Meclisi reisiniñ muavini Ahtem Çiygozğa qabaatlavnı oqudı, onı «fevral 26 işi» boyunca qabaatlaylar. Amma Çiygoz özüni qabaatlı tanımağa red etti, dep bildire onıñ adliyecisi Nikolay Polozov.

«Taqdim etilgen qabaatlav boyunca öz fikrini bildirip, Çiygoz taqdim etilgen qabaatlavnıñ konkret ve açıq-aydın olmağanını qayd ete», – dep yazdı Polozov Twitterde.

Onıñ malümatına köre, Çiygoznıñ işi boyunca nevbetteki toplaşuvnıñ avgust 9-da keçirilecegi belgilendi.

Avgust 2-de, salı künü Aqmescitte Rusiyege boysunğan QırımYuqarı mahkemesi Ahtem Çiygozğa qarşı «fevral 26 işini» baqmağa başladı. Polozovnıñ malümatına binaen, video konferentsiyası rejiminde keçirilgen mahkeme diñlenilmesi teneffüslernen keçirildi, çünki SİZO-dan video bağı er 5 daqqa bozula edi. Neticede eki saatlıq teneffüs ilân etilgen edi.

İyül 20-de mahkeme qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan diger kişiler.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG