Avgust 2-de, salı künü Rostov-na-Donu şeerindeki Şimaliy Qavqaz okrug arbiy mahkemesinde «Hizb ut-Tahrir» teşkilâtınen bağlı olğanında qabaatlanğan Qırım musulmanları işi boyunca nevbetteki mahkeme toplaşuvı keçirildi. Amma mahkeme ekspertniñ video bağını diñlep olamadı.
Bu aqta Qırım.Aqiqatqa qabaatlanğanlardan biriniñ adliyecisi Zair Semedlâyev bildirdi.
«Ekspertnen video konferentsiyası keçirilmek kerek edi, amma bağ bozuldı, dediler ki, bütün devlette video konferentsiyası çalışmadı, bunıñ içün adliyeciler olarnıñ ekspertizalarından bazı şeylerni oqudı ve bunen mahkeme toplaşuvı yekünlendi», – dep ayttı adliyeci.
Onıñ malümatına binaen, işniñ baqılması avgust 3-te saat 11.00-de devam etecek.
Rusiyeli Rostov-na-Donu şeerindeki Şimaliy Qavqaz okrug arbiy mahkemesi dört Qırım musulmanını – Ruslan Zeytullayev, Rustem Vaitov, Nuri Primov ve Ferat Sayfullayevni – mahküm ete, olar 2015 senesi qışta Aqyarda yaqalandı ve «Hizb ut-Tahrir» islâm teşkilâtında iştirak etkenlerinde qabaatlandı. Mayıs ayında olarnıñ apiste bulunma müddeti oktâbr ayına qadar uzattırıldı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
