Link açıqlığı

Saatnıñ esas haberi

Adliyeci: Qırım mahkemesinde Çiygoz boyunca – yaramay video bağı sebebinden eki saatlıq teneffüs


Ahtem Çiygoz
Ahtem Çiygoz

İşğal etilgen Qırımda avgust 2-de Qırımtatar Milliy Meclisi reisiniñ muavini Ahtem Çiygoznıñ «fevral 26 işi» boyunca mahkeme toplaşuvı başlandı. Çiygoznıñ adliyecisi Nikolay Polozovnıñ bildirgenine köre, bir saat keçken soñ Rusiyege boysunğan Qırım Yuqarı mahkemesiniñ toplaşuvında teneffüs ilân etildi.

«SİZO-dan video bağ er 5 daqqa bozula. Böyle etip, iş yıllarca diñlenilecek», – dep yazdı Polozov Twitterde.

Onıñ malümatına köre, Çiygoznıñ babası dayanamadı ve mahkeme zalını terk etti.

15 daqqalıq teneffüsten soñ mahkeme, video konferentsiyası tehnikiy bozuluvlarını yoq etmek içün, 2 saatlıq daa bir teneffüsni ilân etti, dep bildire adliyeci.

İyül 20-de mahkeme qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan diger kişiler.

Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.

«Memorial» uquq qoruyıcı merkezi Rusiyede «Fevral 26 işi» boyunca qabaatlanıp apiste bulunğan Ahtem Çiygoz, Ali Asanov ve Mustafa Degermencini siyasiy mabus olaraq tanıdı.

2016 senesi fevral ayında Rusiyege boysunğan Qırım Yuqarı mahkemesiniñ toplaşuvında bu işni qoşma taqiqatqa yollamaq qararı alındı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG