Link açıqlığı

«Bir-birimizni isitecekmiz»: Qırım mabuslarınıñ qorantaları içün bayram yapılacaq


Elzara İslâmova «Bizim balalar» leyhasınıñ vekilleri ve «Qırım birdemligi» birleşmesiniñ qorüşüvinde

İyül 30-da Aqmescitte «Bizim balalar» leyhasınıñ vekilleri «Qırım birdemligi» birleşmesiniñ iştirakçilerinen körüşti.

«Bizim balalar» leyhasınıñ vekili Elzara İslâmova bildirdi ki, leyhağa Qırımnıñ bütün regionlarında göñülliler qoşula, Qırım mabuslarınıñ balalarına kösterilgen hayriye yardım ise arttı. İyün ayında balalar dörter biñ ruble aldı, iyülde – beşer biñ, birinci sınıfqa baracaqlar (24 bala) – mektepke azırlanmaq içün qoşma olaraq daa ekişer biñ aldı.

«Men ve aqayım Ahtem adından birdemlik sözlerini bildirmek isteyim! Bu sözlerge mında bulunğan bütün qızlar qoşula, çünki bizim içün pek müim bir şey yapasıñız. Tebessüm ve sıcaq sözler bile – pek müim. Men ailelerge köstergen yardımnı endi aytmayım. Ahtemnen laf ettik, balamızğa ayırılğan paranı bu ayda Ali Asanovnıñ qorantasına bermege qarar aldıq. Çoq sağ oluñız, taqımıñız, bütün rayonlarnı dolaşıp, ediyelerni tarqatqan qızlarıñız sağ olsun. Sizler ve sizge bu terbiyeni bergen ana-babalarıñızğa minnetdarmız», – dep ayttı körüşüvde Elmira Ablâlimova, Rusiye uquq qoruyıcıları tarafından apiske atılğan Qırımtatar Milliy Meclisiniñ reis muavini Ahtem Çiygoznıñ ömür arqadaşı.

Sentâbr 13-te Qurban bayram munasebetinen «Bizim balalar» leyhası apiste yatqan musulmanlarnıñ qorantaları içün bayram yapacaq.

«Oynasın, yırlasın, diñlesinler. Ustalarnı davet etermiz, balalarnen resim yapar, nağıp yaparlar. Bir-birimizni isitecekmiz. Lezzetli aşlar, tatlı, bayram pilâvını aşarmız. Böyle bir tedbirge azırlanıñız, başqa planlarıñız bu kün olmasın. Balalarıñıznı alıp keliñiz, soy-soplarıñız, dostlarıñızğa aytıñız. Kün, yer ve saatini evelden haber etermiz», – dep ayttı «Bizim balalar» birleşmesi şurasınıñ azası Elzara İslâmova.

«Bizim balalar» leyhası mubarek Ramazan ayında başladı. Onıñ vazifesi – Qırım siyasiy mabuslarınıñ ve ğayıp olğan qırımtatarlarnıñ qorantalarınıñ balalarına yardım etmektir

«Bizim balalar» leyhası mubarek Ramazan ayında başladı. Onıñ vazifesi – Qırım siyasiy mabuslarınıñ ve ğayıp olğan qırımtatarlarnıñ qorantalarınıñ balalarına yardım etmektir. «Bizim balalar» birleşmesiniñ şurası quruldı, onıñ erkânına lâqayt qalmağan ve itibarlı insanlar kirdi, malümatnı toplağan, sermiyanı toplap tarqatqan insanlar belgilendi. Leyha yalıñız maddiy yardım toplamay. Er angi yardım qabul etile: para, urba ve oyuncaqlar, balalarnıñ tatili ve tedavisi, maneviy yardım, qorantalarnıñ ev işlerinde yardım ve ilâhre.

Bundan evel Qırımda «Qırım birdemligi» birleşmesi peyda oldı. 2016 senesi aprel 9-da Aqyara Qırım insan aqları bağ gruppası «Hizb ut-Tahrir» teşkilâtına bağlı olmasınen qabaatlanğan musulmanlarnıñ soy-soplarını topladı. Soñra «Qırım birdemligi» Qırımnıñ diger siyasiy mabusları, em de qaçırılğan ve ğayıp olğan musulmanlarnıñ aileleri içün öz qapularını açtı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terrorist usullarnı red ete ve Rusiyede adaletsiz taqip etilgenini bildire. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti. Bundan ğayrı, işbu teşkilât Qazahistan, Qıtay ve bir qaç Asiya ve Afrika memleketinde yasaq etildi. Almaniyada «Hizb ut-Tahrir» teşkilâtınıñ faaliyeti sıñırlana. Ukraina ve çoqusı Ğarp memleketinde teşkilât çalışa bile.

XS
SM
MD
LG