Link açıqlığı

Qırım mabusları ve ğayıp olğanlarnıñ balalarına para yardımı kösterildi – Lilâ Bucurova


Lilâ Bucurova

Qırım mabusları ve ğayıp olğan qırımtatarlarnıñ balaları avgust başında «Bizim balalar» leyhası çerçivesinde para yardımını aldı. Bu aqta Qırım mühbiri Lilâ Bucurova avgust 2-de Facebook saifesinde bildirdi.

«İyül 30-da mabuslarnıñ anaları ve apaylarınen nevbetteki körüşüv keçirildi. Er mektepten aldın bala içün anaları 5-er biñ ruble, mektep talebesi çağındaki bala içün (çünki mektepke azırlıq qoşma masraflarnı talap ete) – 7-er biñ ruble aldı. Cedvelimizde mektepke daa barmağan 20 bala ve endi oquğan 24 bala oldı», – dep aytıla beyanatta.

Lilâ Bucurovanıñ qayd etkenine köre, yardım berilgen balalarnıñ sayısı 44-ke arttı.

«Mesele şu ki, cedvelimizge daa ğayıp olğanlarnıñ balalarını qoştıq. Birden bunı yapmağa aqlımızğa kelmegeni içün afu etiñiz. Ve, ğaliba, balalarımıznıñ sayısı daa çoq olacaqtır, çünki bütün malümat ve baba ve oğullarını belli olmağan vaziyette coyğan qorantalarnıñ kontaktları elimizde daa yoq», – dep qayd etti Bucurova ve Qırım sakinlerini yarımadada belgisiz ğayıp olğanlar aqqında malümatnen paylaşmağa çağırdı.

«Bizim balalar» leyhası, Qırım siyasiy mabusları ve ğayıp olğan ya da qaçırılğan qırımtatarlarnıñ qorantalarındaki balalarğa yardım etmek içün teşkil etildi. Leyha çerçivesinde malümat toplanıla ve tertipke ketirile, para toplanıla ve alıcılarğa teslim etile. Çeşit türlü yardım qabul etile: para, urba ve oyuncaqlar, balalarnıñ raatlığı ve tedaviylenüvi teşkil etilmesi, ruhiy reabilitatsiya, mabuslarnıñ qorantalarına hocalıq boyunca yardım.

XS
SM
MD
LG