Rusiye tarafından işğal etilgen Qırımda Radio Svobodanıñ leyhası olğan Qırım.Aqiqat saytı qısmen blok etildi. İnternet qullanıcılarınıñ bildirgenlerine köre, bir sıra provayderler resursqa kirişni blok etti.
Hususan, laf Volâ, Ardinvest, Trinet, Miranda-media, Sky-line, «Apeks Krım» (Keriç), Kerch.net provayderleri aqqında kete, bularnıñ çoqusı yarımadanıñ şimaliy, merkeziy ve şarqiy qısımlarında buluna.
«Qıymetli qullanıcı! Afu etiñiz, amma sorağanıñız resursqa kiriş sıñırlanğan... Peyda olğan sualler boyunca tehnikiy yardımğa muracaat etiñiz», – böyle malümatnı, hususan, Aqmescit sakinleri köre.
Aynı vaqıtta, Kefe ve Aqyarda, bunen beraber, Rusiyede saytqa kiriş açıq.
Roskomnadzor saytında Qırım.Aqiqat saytınıñ blok etilmesi boyunca beyanatlar yoq.
Qırım.Aqiqat saytına kiriş sıñırlanması aqqında Qırımnıñ ameldeki ükümetniñ, hususan, prokuraturanıñ resmiy beyanatları da yoq.
Qırım.Aqiqat ve Radio Svoboda muarririyetinde nevbetteki adımlar yapmaq içün vaziyetni ögreneler.
Mayıs ayında Qırım territoriyasında Radio Svobodanıñ leyhası olğan Qırım.Aqiqat saytına kiriş sıñırlandı, amma bundan soñ kiriş açıldı.
İşğal etilgen Qırımnıñ Moskvağa boysunğan prokuraturası esabat berdi ki, ilk yarım yılda «ekstremistik kontenti olğan» 60 internet-resursqa kirişniñ sıñırlanması aqqında teşebbüs bildirildi.
Aprel ortasında Moskva tarafından tayinlengen yarımada prokurorı Natalya Poklonskaya bildirdi ki, Qırım rusiyeli prokuraturası vesiqalarnı Baş prokuraturağa ve Roskomnadzorğa yollamaq içün azırlay. O qayd etti ki, Qırım.Aqiqat leyhasınıñ tolusınen qapatılmasına irişmege niyetlene, çünki, onıñ fikrince, bu, «ziyankâr hızmetidir» ve Qırım.Aqiqat derc etken malümat «sabotaj aqlanılması, ekstremizm ve Qırımda ükümet organlarını daimiy itibardan tüşürmesine» tolu.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
