Eki ösmür Rusiye tarafından işğal etilgen Qırımnıñ Bağçasaray rayonındaki tarlada tapılğan belli olmağan aletniñ patlavı neticesinde zararlandı. Vaqia iyül 31-de, bazar künü aqşam Kokluz (Bogatoye Uşelye) köyü rayonında yüz berdi. Bu aqta «RİA Krım» agentligi, rusiyeli uquq qoruyıcı organlarındaki menbağa esaslanıp, bildire.
Qayd etilgenine köre, patlav neticesinde 10 yaşındaki ve 14 yaşındaki yerli sakinler yaralandı. Olar Aqmescitteki bala hastahanesine alıp ketirildi.
Rusiye Fevqulade vaziyetler nazirligi ve İçki işler nazirliginiñ Kremlge boysunğan Qırım idareleri saytlarında vaqia boyunca malümat daa bildirilmedi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
