Rusiye ükümeti reisiniñ muavini Dmitriy Kozak avgust 1-de, bazarertesi künü işğal etilgen Qırımğa kelmege planlaştıra. Bu aqta Qırım.Aqiqat bilgili menbadan malümat aldı. Beklenilgenine köre, Rusiyeli nazir muavini Aqmescitte toplaşuv keçirecek.
Bu, soñki yarım ay içinde Qırım kuratorınıñ yarımadağa üçünci ziyareti ola.
Keçken aftanıñ başında Kozak Aqyarda Qırımda yollarnıñ quruluvı boyunca toplaşuvda iştirak etti, onı Rusiye Nazirler kabinetiniñ yolbaşçısı Dmitriy Medvedev keçirdi.
İyül 15-te rusiyeli nazir muavini Aqmescitke kelgen edi, o yerde Qırım memurlarınen yarımada inkişafı federal programmasınıñ ömürge keçirilmesi boyunca toplaşuv keçirdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
