Qırım aydavcılarına eñ yaqın künlerde Keriç parom keçitinden barmamağa rica eteler. İyül 31-de «Deñiz müdirligi» saytında bildirilgen malümatqa köre, bu, paromnen keçmege istegenlerniñ sayısı çoq olğanınen bağlı, bunıñ içün elektron biletleri olğan yolcular ilk nevbette tura.
«Saylağanıñız tarihta biletler yoq olğan vaziyette ziyaretiñizni diger künge keçirmege tevsiye etemiz. Elektron bileti olmayıp keçitke kelgende paromğa keçüvniñ vaqtı uzana bile», – dep aytıla beyanatta.
Bundan evel Rusiye Federatsiyası Naqliye nazirligi Keriç parom keçitinde «töpe noqtası» mevsiminiñ başlanması aqqında bildirgen edi.
Keriç boğazında parom keçiti Qırımnı Rusiye Federatsiyasınıñ Krasnodar ülkesinen bağlağan esas naqliye yolu ola.
