Bütün Dünya Qırımtatar Kongressiniñ (BDQK) icra komitetiniñ nevbetteki toplaşuvı Türkiyedeki Eskişehir şeerinde keçirile. Bu aqta Meclis azası Eskender Bariyev bildirdi.
Merasim iyül 31-ge qadar devam etecek. Toplaşuvda qırımtatarlarnıñ lideri Mustafa Cemilev iştirak ete.
Bundan evel Meclis reisi Refat Çubarov bildirdi ki, BDQK icra komiteti toplaşuvlarnı 2,5 ayda bir kere qırımtatar diasporası büyük olğan devletlerniñ birinde keçirile. Evelki toplaşuv Vilnüste keçirildi. Noyabr ayında toplaşuvnıñ Poloniyada, Varşavada keçirilmesi planlaştırıla.
Qırım işğal etilgen soñ Rusiye qırımtatar liderleri Mustafa Cemilev ve Refat Çubarovğa yarımadağa kirişni yasaq etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
