Link açıqlığı

Qırımda İnternette çalışmaq içün «antiterroristik» közetüv taqımları teşkil etile


Kremlge boysunğan Qırım ükümetiniñ yolbaşçısı Sergey Aksönov İnternet ağında terrorizm profilaktikasınen oğraşacaq, bu cümleden, «terrorizm fikirlerine yaqın olğanında» şeklenilgen adamlarnen «adres işini» alıp baracaq mütehassıslarnı toplamağa istey.

Bu aqta terrorizmge qarşı komissiya ve operativ ştabınıñ toplaşuvında söz yürsetildi, dep bildire Aksönovnıñ matbuat hızmeti.

Böyleliknen, matbuat hızmetinde qayd ettiler ki, «ihtisaslı, bunen beraber, İnternet ağında çalışqan, mütehassıslarnıñ saylanılması boyunca işniñ eyileştirilmesi» meselesi baqıldı.

«Terrorizmge qarşı faaliyet tecribesi, terrorizm fikirleriniñ yayılması ve cinaiy elementler faaliyetiniñ idare etilmesi İnternet ağı vastasınen yapılğanını bildire. Qayd etilgen mütehassıslar terrorizm mefküresine yaqın olğan ya da onıñ tesirine endi oğrağan şahıslarğa adres profliaktika vastasınen tesir etmek kerek», – dep ayttı Aksönov.

Rusiye prezidenti Vladimir Putin «terrorizmge qarşı paketini» iyül 7-de imzaladı. Deñişmeler paketi «çaqmama» ve kütleviy nizamsızlıqta iştirak etmesine «yaqınlaşma» içün cinaiy mesüliyetniñ kirsetilmesini belgiley. Bunen beraber, bağ operatorları endi müşterilerniñ bütün telefon laflarını ve mesajlarını yazmaq ve saqlamaq mecbur.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG