Kreml tarafından tayinlengen Qırım yolbaşçısı Sergey Aksönov Qırımnı 2,5 million turist ziyaret etkenini bildire. Onıñ sözlerine binaen, bu, keçken seneniñ aynı müddetine köre, 26%-ğa ziyadedir, dep bildire Kremlge boysunğan Qırım ükümetiniñ matbuat hızmeti.
Bunen beraber, Aksönov bildirdi ki, Sıñır hızmeti ve Federal migratsion hızmetiniñ malümatına binaen, turistlerniñ 15%-ı «Ukrainadan kelgen turistlerdir», ve «bu seneniñ soñuna qadar Qırımnı 6 million turist ziyaret etecegine» ümüt beslegenini qayd etti.
İyül 25-te, bazarertesi künü Aqyar inkişafı leyhaları boyunca bölükniñ müdiri Sergey Smirnov apparat toplaşuvında qayd etti ki, şeerni 180 biñ turist ziyaret etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
