Link açıqlığı

İşğal etilgen Qırımnıñ Rusiye Cenübiy federal okrugına qoşulması kösterdi ki, Kreml içün esas diqqat obyekti «Qırım territoriyasıdır, anda yaşağan adamlar degil». Böyle fikirni Qırımtatar Milliy Meclisiniñ reisi Refat Çubarov Radio Svobodağa bergen izaatında bildirdi.

Onıñ fikrince, Moskvanıñ bu adımınıñ maqsadı Qırım territoriyasında «umumrusiye devlet menfaatlarınıñ» ömürge keçirilmesidir.

«Şoygu o yerde bir qaç kün evel bulundı. O, Putinge Qırımnıñ arbiy teminlenmesiniñ bu vaqıtqa planlaştırılğan qısmı niayet yekünlengenini ve «Qırım cenkke azır» olğanını bildirdi», – dep qayd etti Çubarov.

«Putinniñ, işğalci ükümetiniñ, insan aqları meseleleri, Qırımnıñ rekreatsion imkânları aqqında şiarlarnen üstüni örtken vaqtı endi keçti. Endi, Qırım, kerçekten de, arbiy forpostqa çevirilgen soñ, olar onı doğru federal okruglarnıñ birine qoşalar. Rusiye Federatsiyasınıñ federal okruglarınıñ vazifeleri nasıl olğanını bilesiñiz. Bu, yekâne prezident vertikali boyunca emirlerniñ ömürge keçirilmesidir», – dep qayd etti Qırımtatar Milliy Meclisiniñ reisi.

İyül 28-de Rusiye prezidenti Vladimir Putin «Cenübiy federal okrug aqqında» fermannı imzaladı, bu okrugnıñ içine işğal etilgen Qırımnı kirsetti. Böyleliknen, 2014 senesi yarımadanıñ işğalinden soñ teşkil etilgen Rusiyede Qırım federal okrugı yoq etildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG