Rusiye tarafından işğal etilgen Aqyarda avgust ayında meskün evlerinde elektrik energiyası söndürilecek. Kremlge boysunğan şeer akimiyetiniñ saytında söndürüvler cedveli yerleştirildi.
Yerli ükümet qayd ete ki, söndürüvler plan boyunca, transformator stantsiyalarında tamir işleri alıp barılğanı sebebinden yapıla.
Bundan evel Yaltadaki «Krımenergo» idaresi iyül-avgust ayında elektrik energiyasınıñ söndürilecegi aqqında bildirgen edi.
Rusiye tarafından işğal etilgen Qırımda, 2016 senesi baarinde rusiyeli energetik köprüniñ üçünci yipi işke tüşürilgenine baqmadan, yarıq söndürilmege devam ete.
Qırımda 2015 senesi dekabr ayından başlap Herson vilâyetinde yerleştirilgen elektrotayamanıñ ihtimal patlavı sebebinden Ukrainadan elektrik energiyasınıñ berilmesi toqtatıldı. Şimdiki vaqıtta, Rusiye tarafından işğal etilgen Qırım kendi generatsiya, Rusiyeden generator tertibatı ve Kubandan yapılğan energiya köpüri yardımı ile teminlene.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
