Link açıqlığı

Rusiyeniñ Qırımnı işğal etmek ıntıluvını nasıl olsa da «resmiyleştirmek» niyeti, yarımada Ukrainanıñki olğanını red etmez, dep ayttı Brüsselde keçirilgen telefon matbuat konferentsiyasında OSCE yanındaki AQŞ elçisi Deniel Bayer. Onıñ sözlerine köre, Avropa regionında havfsızlıq aqqında er angi muzakereler Qırımnıñ qaytarılması meselesinden başlanacaq.

«Kreml, haritada territoriyalarnıñ yañıdan resimlerini yapıp, nasıl gimnastika «meşğuliyetlerini» yapsa da, Rusiye temsilcileri avropalı havfsızlıq kelecegi aqqında laf etmege başlağanda, bizim noqta-i nazarımız şu ki, avropalı havfsızlıq boyunca er angi muzakereler Qırımdan başlana. Ve Rusiye 21-ci asırda silâlı yolnen sıñırlarnı deñiştirmege tırışqanından», – dep ayttı elçi.

Bayerniñ sözlerine köre, o, işğal etilgen Qırımnı de bu, de başqa federal okrugına boysundırğan Rusiyeniñ maqsatlarını bilmey, amma rusiyeli bergi tölegenler böyle areketler içün yüksek fiyatlar tölegenlerinde emin. Elçiniñ qayd etkenine binaen, Kremlniñ böyle areketlerine baqmadan, Qırım ep bir uquq tarafından Ukrainanıñki qala, ve hususan buña Amerika Qoşma Ştatları ve diger ğarp devletleri esaslana.

Bunen beraber, Bayer Donbasstaki dava çezilmesi boyunca sözde bulundı, ve qayd etti ki, Rusiye barışıq aqqındaki sözlerini konkret areketlernen tasdıqlamaq kerek, eñ evelâ, Minsk añlaşmalarınıñ Donbassta sıñır qısmını Ukraina nezaretine qaytarmaq aqqındaki maddesini ömürge keçirmek kerek.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

İyül 28-de Rusiye prezidenti işğal etilgen Qırımnıñ ayrı okrugını yoq etti ve yarımadanı Rusiye Cenübiy okrugına qoştı.

XS
SM
MD
LG