Kreml tarafından tayinlengen işğal etilgen Qırımnıñ ameldeki yolbaşçısı Sergey Aksönov Oleg Belaventsevge yañı vazifede muvafaqiyet tiledi, onı Rusiye prezidenti iyül 28-de Şimaliy-Qavqaz federal okrugında öz temsilcisi vazifesine tayinledi.
Bundan evel Belaventsev Rusiye prezidentiniñ Qırımdaki vekâletli temsilcisi edi.
«Biz, prezidentniñ askerleri olamız ve onıñ emirlerini yerine ketiremiz... Qırım sakinleri Oleg Yevgenyeviç Belaventsevge, «Qırım baari» ğalebesine, Qırımnıñ Rusiyege qoşulmasına büyük isse qoşqanı içün, yüksek qıymet kese. O, Rusiye vatanperveri ve rus zabitiniñ eñ yahşı hususiyetlerini kösterdi. Oleg Yevgenyeviçke yañı mesüliyetli vazifede samimiy muvafaqiyet tileyim», – dep yazdı Aksönov Facebook saifesinde.
İyül 28-de Putin öz fermanınen işğal etilgen Aqyar gubernatorı Sergey Menaylonı istifağa çıqardı ve onı Sibir federal okrugına vekâletli temsilci vazifesine tayinledi. Menâylo yerine vaqtınca Dmitriy Ovsânnikov belgilendi.
Bunen beraber, iyül 28-de Rusiye prezidenti Vladimir Putin «Cenübiy federal okrug aqqında» fermannı imzaladı, bu okrugnıñ içine işğal etilgen Qırımnı kirsetti. Böyleliknen, 2014 senesi yarımadanıñ işğalinden soñ teşkil etilgen Rusiyede Qırım federal okrugı yoq etildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
