Link açıqlığı

Konstantinov: Qırımnıñ Rusiye Cenübiy okrugına qoşulması yarımada sakinlerine tesir etmez


Vladimir Konstantinov

Rusiye prezidenti Vladimir Putinniñ işğal etilgen Qırımnıñ Cenübiy federal okrugğa qoşulması aqqında qararı yarımada sakinleriniñ ayatına tesir etmez. Böyle fikirni Kremlge boysunğan yarımada parlamentiniñ yolbaşçısı Vladimir Konstantinov bildirdi.

«Umumen olaraq, okruglarnıñ birleşmesi yarımadamıznıñ sakinlerine tesir etmez, böyle esnas idare effektivligini arttırmağa yardım etecek, bunen beraber, Qırım hususiyetlerine baqmadan, qomşu regionlarnen çoq oşağan şeylerimiz bar», – dep yazdı Konstantinov Facebook saifesinde.

Moskva tarafından tayinlengen yarımada yolbaşçısı Sergey Aksönov rusiyeli prezidentniñ Qırım boyunca fermanlarına şimdilik izaat bermedi.

İyül 28-de Rusiye prezidenti Vladimir Putin «Cenübiy federal okrug aqqında» fermannı imzaladı, bu okrugnıñ içine işğal etilgen Qırımnı kirsetti. Böyleliknen, 2014 senesi yarımadanıñ işğalinden soñ teşkil etilgen Rusiyede Qırım federal okrugı yoq etildi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG