«Rusiye kommunistleri» partiyasınıñ Qırım bölüginiñ lideri Leonid Graç, Sergey Menâylo Aqyar gubernatorı vazifesinden boşatılıp, Rusiye Sibir federal okrugına işke yollanılğan soñ, aynı qader Qırımnıñ rusiyeli yolbaşçısı Sergey Aksönov ve yarımadanıñ ameldeki parlament reisi Vladimir Konstantinovnı beklegeninden emin.
Bu aqta Graç Qırım.Aqiqatqa bergen izaatında bildirdi.
«İzaatlarımdan birinde Menâylonı Şimaliy Osetiyağa – vatanına yollağan edim. Bir vaqıt em Aksönov, em de Konstantinov Sibirge bir yerge ketmek kerek olacağı aqqında aytqan edim. Amma bu üçten birinci olaraq Menâylo ketti. Elbet, bu selâmdır, Aksönovnıñ taqımına açıq selâmdır», – dep ayttı Graç.
İyül 28-de Putin öz fermanınen işğal etilgen Aqyar gubernatorı Sergey Menaylonı istifağa çıqardı ve onı Sibir federal okrugına vekâletli temsilci vazifesine tayinledi. Menâylo yerine vaqtınca Dmitriy Ovsânnikov belgilendi.
Menâylonıñ, ve işğal etilgen Qırım reberiyetiniñ Putin fermanları boyunca izaatları şimdilik yoq.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
