Link açıqlığı

Amerika Qoşma Ştatları prezidentine Cumhuriyet firqasından namzet Donald Trampnıñ, devlet prezidenti vazifesine saylanılsa, Qırımnıñ rusiyeli olğanını resmiy olaraq tanımasını baqmağa azır olğanı aqqında beyanatı, bu saylavaldı şiarlardır, dep ayttı Rusiyege boysunğan Qırım yolbaşçısı Sergey Aksönov.

«Birinciden, Qırım sakinleri Ğarp liderleriniñ tanımasına muhtac degil. Öz saylavımıznı bir kere ve ebediyen yaptıq. Eger AQŞ siyasiy isteblişmentiniñ bir qısmı Trampnıñ yüzünde kerçekni tanımağa azır olsa – bunı tek alğışlay bilemiz», – dep yazdı Aksönov Facebook saifesinde.

«Ekinciden, Donald Tramp – şimdilik tek prezident vazifesine namzet ola, onıñ aytqanları ise, – saylav ögündeki safsata ola. Saylavlarda ğalebe qazansa, özüni nasıl alıp baracağını bilmeymiz», – dep ayttı o.

Aynı böyle fikirni «RİA Novosti» agentligine izaat bergen Kremlge boysunğan Qırım ükümetiniñ baş naziriniñ birinci muavini Mihail Şeremet de bildirdi.

«Prezident Trampnıñ beyanatını eşitmege ister edik. Bu tek saylavaldı şiarlardır, amma aqıl-ferasetke ümüt besleymiz», – dep qayd etti Şeremet.

Onıñ sözlerine köre, Donald Tramp, «Qırım sakinleriniñ ayatını öz közünen körmek ve yarımadanıñ rusiyeli statusını tanıması boyunca noqta-i nazarını qaviyleştirmek içün», Qırımnı ziyaret etmek kerek.

İyül 27-de, çarşenbe künü Donald Tramp Rusiyege qarşı sanktsiyalarnıñ lâğu etilmesi meselesini baqmağa azır olğanını ilân etti. Bu aqta «Amerika sesi», amerikalı Politico neşrine esaslanıp, bildire.

«Elbet, bunı baqacaqmız», – dep ayttı siyasetçi, Qırım ve Rusiye aqqında sualine cevap berip.

Cumhuriyetçiniñ sözleri, ekspertler tarafından çoq izaatlarnıñ peyda olmasına yol berdi.

«Bu amerikalı ve avropalı qıymetler ve menfaatlarnıñ deñişmesidir», – dep bildirdi Twitterde Harvard Kennedy School professorı Nikolas Berns.

«Tüşünmedim ki, Tramp daa ziyade Putin tarafını tutqan ola bile, amma endi o ayta ki, sanktsiyalarnı lâğu ete bile ve Qırım işğalini tanıy bile. Şaşılacaq bir şey», – dep qayd etti CFR analitika merkeziniñ tedqiqatçısı Maks But.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG